د سرحدونو، قومونو او قبایلو چارو وزیر ملا نورالله نوري د غزني په جاغوري ولسوالۍ کې یوې ولسي غونډې ته ویلي چې پاکستان دې د افغانانو له صبر او حوصلې ناوړه ګټه نه اخلي.
نوري پر پاکستان د نیوکې پر مهال ویلي، دغه هېواد دې د افغانستان له تاریخ، جغرافیې او خپلو تېرو تجربو څخه عبرت واخلي.
هغه زیاته کړې چې د حیرانتیا ځای دی، چې پاکستان د افغانانو تاریخ او مبارزه پېژني، خو بیا هم د نوموړي په وینا، د اسلامي اصولو، ګاونډیتوب او نړیوال قانون خلاف پر افغان خاوره تېری کوي.
نوري ویلي چې افغانان د پاکستان کړنې څاري او ډېری افغانان د خپلې خاورې د ساتنې او دفاع لپاره ژمن دي.
نوموړي تېره اونۍ هم پاکستان ته ورته پیغام ورکړی و او ویلي یې و چې پاکستان باید د افغانستان تاریخ، عقیده، تجربې او سیاست په پام کې ونیسي.
Total Views:
0