په اسعداباد کې د ا.ا د برېښنا مسوولانو ویلي، چې د کونړ پر سیند د برېښنا بند جوړولو لپاره د پنځو سیمو سروې او تخنیکي چارې بشپړې شوې دي.
د کونړ ځايي چارواکو ویلي، د دغې سروې موخه پر کونړ سیند د اوبو او برېښنا بندونو د جوړولو لپاره د مناسبو ځایونو معلومول دي.
د کونړ د برېښنا امر عمر ګل نایب ویلي، د لومړنیو تخنیکي چارو له بشپړېدو وروسته به په دغو سیمو کې د بندونو د جوړولو عملي کارونو ته زمینه برابره شي.
د کونړ اوسېدونکو د دې پروژې هرکلی کړی او ویلي یې دي، چې د بندونو په جوړېدو سره به یې کرنیزې ځمکې او کورونه د سېلابونو له خطرونو خوندي شي او د سیمې اقتصادي پرمختګ ته به زمینه برابره شي.
تر دې مخکې د هند د بهرنیو چارو وزارت هم پر کونړ سیند د بند جوړولو په برخه کې د اوبو د سرچینو د مدیریت لپاره د همکارۍ چمتووالی ښودلی و.
دا څرګندونې داسې مهال کېږي، چې د ا.ا ځینو مشرانو له پاکستان سره د وروستیو نښتو وروسته پر کونړ سیند د بند جوړولو خبر ورکړی و.
